Waqt Nahi

Har khushi hai logon ke daaman mein,
Hansi ke liye WAQT NAHI-

Din raat daudti duniya mein,
Zindagi ke liye WAQT NAHI-

Maa ki lori ka ehsaas to hai,
Par maa ko maa kehne ke liye WAQT NAHI-

Saare rishton ko to hum maar hi chuke hai,
Ab unhe dufnane ka bhi WAQT NAHI-

Saare naam mobile mein hain,
Par dosti ke liye WAQT NAHI-

Gairon ki kya baat karien,
Jab aapno ke hi liye WAQT NAHI-

Aakhon mein hai neend badee,
Par sone ke liye WAQT NAHI-

Dil hai ghamon se bhara hua,
Par rone ke liye bhi WAQT NAHI-

Paison ke daud mein aise daude,
Ki thakne ka bhi WAQT NAHI-

Paraye ehsason ki kya kadr karein,
Jab aapne sapnon ke liye hi WAQT NAHI-

Ishwar ke sab bhakt hain,
Par uski chaukhat take jaane ka bhi WAQT NAHI-

Tu hi bata ae zindagi,
Iss zindagi ka kya hoga,
Ki har pal marne waalon ko,
Jeene ka bhi WAQT NAHI-